Ólafía Þórunn Kristinsdóttir lék á parinu á lokahringnum á Cambia Portland Classic mótinu sem er hluti af LPGA mótaröðinni í Bandaríkjunum. Ólafía lék samtals á -5 samtals (70-72-69-72). Hún endaði í 39. sæti og var 15 höggum á eftir Stacy Lewis frá Bandaríkjunum sem sigraði á -20 samtals. Ólafía Þórunn fékk rúmlega 730.000 kr. í verðlaunafé fyrir árangurinn í Oregon. Alls hefur hún fengið 7,7 milljónir kr. í verðlaunafé á keppnistímabilinu.

Þetta er fjórði besti árangur Ólafíu Þórunnar á LPGA mótaröðinni. Besti árangur hennar er 13. sæti á Opna skoska meistaramótinu. Alls hefur hún leikið á 18 mótum á tímabilinu. Hún hefur komist í gegnum niðurskurðinn á 8 mótum.

Ólafía Þórunn er í 101. sæti á peningalistanum eftir mótið en 100 efstu í lok keppnistímabilsins halda keppnisrétti sínum á sterkustu mótaröð heims. Hún hefur þokað sér upp peningalistann á undanförnum mótum. Næsta mót hjá Ólafíu Þórunni er Indy Women sem fram fer í Indianapolis 7.-9. september. Í vikunni þar á eftir fer fram fimmta og síðasta risamót ársins, Evian meistaramótið í Frakklandi. Síðan tekur við keppnistörn á LPGA þar sem keppt er í Eyjaálfu og Asíu. Það liggur ekki fyrir á hve mörgum mótum Ólafía fær að keppa á í þeirri törn.

Staðan: