Þrír íslenskir kylfingar úr röðum Golfsamtaka fatlaðra á Íslandi verða á meðal keppenda á Opna sænska meistaramótinu í golfi sem fram fer um næstu helgi. Keppt verður á glæsilegum keppnisvelli í borginni Kalmar og stendur keppnin yfir í tvo daga.
Sveinbjörn Guðmundsson, Elín Fanney Ólafsdóttir og Þóra María Fransdóttir verða fulltrúar Íslands á þessu móti. Minningarsjóður Harðar Barðdal styður við bakið á keppendunum í þessu verkefni og fær hver kylfingur 75.000 kr. í styrk úr sjóðnum.
