Gunnlaugur Árni Sveinsson hafnaði í þriðja sæti á Pauma Valley Invitational í Kaliforníu í bandaríska háskólagolfinu. Hann lék hringina þrjá á 69-70-67 eða 7 höggum undir pari vallar og var eini kylfingurinn til að leika lokahringinn án þess að fá skolla eða skramba. 

Smelltu hér fyrir stöðuna:

Skólinn hans Gunnlaugs Árna, LSU, gerði sér lítið fyrir og sigraði með 10 högga mun en í mótinu voru sex af sjö bestu skólunum í efstu deild NCAA. 

Smelltu hér fyrir stöðuna í liðakeppninni:

Mótið var eitt allra sterkasta háskólamót á þessu skólaári en af 20 efstu kylfingum á heimslista áhugakylfinga voru 8 á meðal þátttakenda í mótinu.  

Gunnlaugur Árni hefur náð mögnuðum árangri á þessu skólaári. Hann hefur náð besta árangri allra nýliða í háskólagolfinu og þegar heimslisti áhugakylfinga verður uppfærður næsta miðvikudag mun hann í fyrsta skipti vera á meðal 50 bestu áhugakylfinga heims.

*Styrkleiki móts skv. heimslista áhugakylfinga. Áhugamannamót hafa styrkleika á bilinu 10 til 1000. Íslandsmótið í höggleik 2024 var með 111 í styrkleika í karlaflokki.