Guðmundur Ágúst Kristjánsson er í áttunda sæti eftir fyrsta keppnisdaginn á Nordic golf mótaröðinni sem fram fer í Finnlandi. GR-ingurinn er einn af fimm íslenskum kylfingum sem taka þátt á þessu móti.
Andri Þór Björnsson, Axel Bóasson, Haraldur Franklín Magnús og Ólafur Björn Loftsson eru einnig á meðal keppenda.
Guðmundur Ágúst lék á 67 höggum (-5), og er hann tveimur höggum frá efsta sætinu. Andri Þór (GR) og Axel (GK) lék á -2 eða 70 höggum. Þeir eru í 28. sæti. Ólafur Björn (GKG) er á parinu eða 72 höggum. Hann er í 49. sæti. Haraldur Franklín lék á +4 eða 76 höggum og er GR-ingurinn í 88. sæti.
