Forskot, afrekssjóður, mun styðja við bakið á alls sex atvinnukylfingum á árinu 2023. Forskot hefur frá árinu 2012 úthlutað styrkjum til afrekskylfinga og er úthlutunin í ár sú 12. í röðinni.
Að sjóðnum standa: Eimskip, Valitor, Íslandsbanki, Icelandair, Vörður tryggingar, Bláa Lónið og Golfsamband Íslands.

Frá stofnun sjóðsins hefur markmiðið að gera styrkþegum auðveldara fyrir að æfa og keppa við bestu skilyrði í samræmi við það sem gerist á alþjóðlegum vettvangi í golfíþróttinni.

Axel Bóasson, Bjarki Pétursson, Guðmundur Ágúst Kristjánsson, Guðrún Brá Björgvinsdóttir, Haraldur Franklín Magnús og Ragnhildur Kristinsdóttir fá úthlutað úr sjóðnum í ár.

Guðmundur Ágúst Kristjánsson er fæddur árið 1990 og gerðist atvinnukylfingur árið 2017. Guðmundur Ágúst er með keppnisrétt á DP World Tour, Evrópumótaröðinni, sem er í hæsta styrkleikaflokki atvinnumótaraða í karlaflokki í Evrópu. Hann er annar íslenski karlkylfingurinn sem nær keppnisrétti á DP World Tour, en Birgir Leifur Hafþórsson var sá fyrsti. Guðmundur Ágúst hóf yfirstandandi keppnistímabili í desember á síðasta ári og framundan er spennandi tímabil á DP World Tour.

Haraldur Franklín Magnús er fæddur árið 1991 en hann gerðist atvinnukylfingur árið 2017. Hann er með keppnisrétt á Challenge Tour, Áskorendamótaröðinni, sem er næst efsti styrkleikaflokkur hjá atvinnukylfingum í karlaflokki í Evrópu. Haraldur Franklín mun leika á fjölmörgum mótum á Challenge Tour á keppnistímabilinu.

Guðrún Brá Björgvinsdóttir er fædd árið 1994 og hún gerðist atvinnukylfingur árið 2018. Guðrún Brá tryggði sér keppnisrétt á LET Evrópumótaröðinni árið 2020 eftir að hafa leikið á LET Access mótaröðinni frá árinu 2018. Guðrún Brá fær fjölmörg tækifæri á sterkum mótum á tímabilinu en hún er með keppnisrétt á LET Evrópumótaröðinni, en mótaröðin er í efsta styrkleikaflokki atvinnumótaraða í kvennaflokki í Evrópu.

Axel Bóasson er fæddur árið 1990 en hann gerðist atvinnukylfingur árið 2013. Axel er með keppnisrétt á Nordic Golf League mótaröðinni sem er í þriðja efsta styrkleikaflokki atvinnumótaraða í Evrópu í karlaflokki. Axel á góðar minningar frá Nordic Golf League mótaröðinni en hann varð stigameistari á mótaröðinni árið 2017 – og fékk í kjölfarið keppnisrétt á Challenge Tour, Áskorendamótaröðinni tímabilið 2017-2018.

Bjarki Pétursson er fæddur árið 1994 og er hann með keppnisrétt á Challenge Tour, Áskorendamótaröðinni, og Nordic Golf League. Bjarki komst inn á lokaúrtökumót DP World Tour í nóvember á síðasta ári – í annað sinn á ferlinum. Bjarki hefur verið atvinnukylfingur frá árinu 2019.

Ragnhildur Kristinsdóttir er fædd árið 1997 og er hún á sínu fyrsta ári sem atvinnukylfingur. Ragnhildur fór í úrtökumótið fyrir LET Evrópumótaröðina í fyrsta sinn í desember á síðasta ári. Hún er með keppnisrétt á LET Access atvinnumótaröðinni á þessu tímabili, sem er næst sterkasta atvinnumótaröð Evrópu hjá atvinnukonum í golfi.

Markmiðið með stofnun Forskots afrekssjóðs árið 2012 var að búa til reynslu og þekkingarbrunn sem skili sér til kylfinga framtíðarinnar og ungir kylfingar geti litið til í sínum framtíðaráætlunum.

Ríkar kröfur eru gerðar til þessara íþróttamanna um ráðstöfun styrkjanna. Ber þeim að leggja fram æfinga- og keppnisáætlanir auk fjárhagsáætlunar fyrir verkefni sín auk þess sem gerðir eru sérstakir samningar við hvern kylfing um að þeir virði reglur Íþrótta- og Ólympíuhreyfingarinnar.

Þeir kylfingar sem fá úthlutað úr Forskoti afrekssjóði eru sterkar fyrirmyndir. Það að eiga afreksmenn í íþróttum er stór og mikilvægur þáttur í því að fá börn og unglinga til að sinna íþróttum. Því er litið á sjóðinn sem mikilvægt skref til að efla íþróttir barna og unglinga og hvetja þau til dáða.

Einn fulltrúi frá þeim sem aðild eiga að Forskoti er í stjórn sjóðsins og auk þess hefur stjórn sér til ráðgjafar fagteymi sem gerir tillögur um úthlutanir úr sjóðnum.

2023
Guðmundur Ágúst Kristjánsson.
Haraldur Franklín Magnús.
Guðrún Brá Björgvinsdóttir.
Axel Bóasson.
Ragnhildur Kristinsdóttir.
Bjarki Pétursson.

2022
Haraldur Franklín Magnús.
Guðmundur Ágúst Kristjánsson.
Guðrún Brá Björgvinsdóttir.
Axel Bóasson.
Aron Snær Júlíusson.

2021
Bjarki Pétursson.
Guðmundur Ágúst Kristjánsson.
Guðrún Brá Björgvinsdóttir.
Haraldur Franklín Magnús.
Valdís Þóra Jónsdóttir.

2020
Bjarki Pétursson.
Guðmundur Ágúst Kristjánsson.
Guðrún Brá Björgvinsdóttir.
Haraldur Franklín Magnús .
Ólafía Þórunn Kristinsdóttir.
Valdís Þóra Jónsdóttir.

2019
Ólafía Þórunn Kristinsdóttir.
Valdís Þóra Jónsdóttir.
Birgir Leifur Hafþórsson.
Axel Bóasson.
Andri Þór Björnsson.
Haraldur Franklín Magnús.
Guðmundur Ágúst Kristjánsson.

2018
Andri Þór Björnsson.
Axel Bóasson.
Birgir Leifur Hafþórsson.
Guðrún Brá Björgvinsdóttir.
Guðmundur Ágúst Kristjánsson.
Haraldur Franklín Magnús.
Ólafía Þórunn Kristinsdóttir.
Valdís Þóra Jónsdóttir.

2017
Ólafía Þórunn Kristinsdóttir.
Valdís Þóra Jónsdóttir.
Birgir Leifur Hafþórsson.
Axel Bóasson.
Andri Þór Björnsson.
Haraldur Franklín Magnús.
Guðmundur Ágúst Kristjánsson.

2016
Axel Bóasson.
Birgir Leifur Hafþórsson.
Ólafía Þórunn Kristinsdóttir.
Valdís Þóra Jónsdóttir.
Þórður Rafn Gissurarson.

2015
Axel Bóasson.
Birgir Leifur Hafþórsson.
Ólafía Þórunn Kristinsdóttir.
Ólafur Björn Loftsson.
Valdís Þóra Jónsdóttir.
Þórður Rafn Gissurarson.

2014
Birgir Leifur Hafþórsson.
Ólafía Þórunn Kristinsdóttir.
Ólafur Björn Loftsson.
Valdís Þóra Jónsdóttir.
Axel Bóasson.
Kristján Þór Einarsson.

2013
Birgir Leifur Hafþórsson.
Ólafur Björn Loftsson.
Þórður Rafn Gissurarson.
Ólafía Þórunn Kristinsdóttir.
Axel Bóasson.
Einar Haukur Óskarsson.

2012
Birgir Leifur Hafþórsson.
Tinna Jóhannsdóttir.
Stefán Már Stefánsson.
Ólafur Björn Loftsson
Þórður Rafn Gissurarson.