Allar flatir á Jaðarsvelli á Akureyri eru lausar við snjó og klaka. Þetta kemur fram í frétt á heimasíðu Golfklúbbs Akureyrar en Íslandsmótið í golfi 2021 fer fram á Jaðarsvelli dagana 5.-8. ágúst.
Hitastigið hefur verið hátt undanfarna daga á Akureyri þar sem að hlýir sunnan vindar hafa ráðið ríkjum. Sólin skein skært samhliða þessum miklu hlýindum. Starfsmenn GA hafa unnið hörðum höndum í vetur að létta á snjó og tryggja það að snjór og klaki fari af flötunum eins fljótt og mögulegt er. Í byrjun ársins 2021 snjóaði mikið á Akureyri og er veturinn fram til þessa einn sá allra snjóþyngsti í mörg ár.
Meðfylgjandi eru tvær myndir sem teknar voru þann 19. mars og sína þær flatirnar í flottu ásigkomulagi og því full ástæða til að láta sig hlakka til sumarsins – segir í tilkynningu frá GA.
