Fjórir íslenskir keppendur eru á meðal þátttakenda á Spirit International áhugamannamótinu sem fram fer í Bandaríkjunum. Um er ræða einstaklings – og liðakeppni þar sem að 20 þjóðir taka þátt.
Mótið í ár er það 10. í röðinni en keppendur sem hafa tekið þátt á þessu móti í gegnum tíðina hafa sigrað á samtals 650 atvinnumótum, þar af 25 risamótum, 16 mótum á PGA mótaröðinni, 25 mótum á Evrópumótaröð karla, 23 mótum á LPGA mótaröðinni og 21 móti á LET Evrópumótaröðinni.
Hulda Clara Gestsdóttir, Ragnhildur Kristinsdóttir, Hlynur Bergsson og Dagbjartur Sigurbrandsson skipa íslenska liðið og Tómas Aðalsteinsson er liðsstjóri. Íslensku keppendurnir eru allir í námi í bandarískum háskólum og leika þar keppnisgolf með sínum skólaliðum. Tómas er þjálfari hjá bandarísku háskólaliði.
Fylgstu með gangi mála á Instagram síðu Team Iceland.
Smelltu hér fyrir skor og úrslit mótsins:
Smelltu hér fyrir upplýsingar um íslenska liðið:
Alls taka 20 þjóðir þátt: Argentína, Belgía, Kanada, Taiwan, Kólumbía, Danmörk, England, Finnland, Frakkland, Ísland, Írland, Ítalía, Mexíkó, Noregur, Skotland, Suður-Afríka, Spánn, Svíþjóð, Sviss, Bandaríkin,
Keppnin fer fram 4.-6. nóvember en leikið er á Whispering Pines Golf Club í Texas. Völlurinn er í 55. sæti yfir bestu golfvelli heims að mati Golf Digest.
Alls eru 80 keppendur og verða leiknar 54 holur. Keppt er í liðakeppni kvenna – og karla, einstaklingskeppni kvenna – og karla, og einnig er keppt í sameiginlegri alþjóðlegri liðakeppni. Keppt er í höggleik og veitt verða verðlaun fyrir þrjú efstu sætin í öllum keppnisflokkum.
