Karlalandslið Íslands keppti í efstu deild á Evrópumeistaramóti í liðakeppni 2021 dagana 6. – 10. júlí 2021. Keppt var á PGA Catalunya vellinum á Spáni rétt utan við borgina Barcelona. Heiðar Davíð Bragason var þjálfari liðsins í þessari ferð og Baldur Gunnbjörnsson sjúkraþjálfari var einnig með í för.

Upplýsingar um rástíma, skor og úrslit má nálgast hér:

Keppni hófst 6. júlí og lokakeppnisdagurinn var 10. júlí. Keppnisfyrirkomulagið var með þeim hætti að fyrstu tvo keppnisdagana er leikinn höggleikur – 36 holur alls. Fimm bestu skorin telja hjá hverju liði. Átta efstu liðin léku til úrslita um Evrópumeistaratitilinn í holukeppni sem tók við af höggleiknum. Liðin í sætum nr. 9 -13 léku um fall í 2. deild.

Frakkar og Danir léku til úrslita um Evrópumeistaratitilinn – þar sem að Danir höfðu betur og fögnuðu sigri í fyrsta sinn í þessari keppni. Belgar náðu þriðja sætinu eftir sigur gegn Spánverjum.

Ísland mætti Írum í fyrstu umferð riðlakeppninnar. Þar höfðu Írar betur 4-1. Aron Snær Júlíusson og Hlynur Bergsson fengu báðir 1/2 stig úr sínum viðureignum.

Ísland mætti liði Sviss í næstu umferð og tapaðist sá leikur 3-2. Sverrir Haraldsson og Hlynur Bergsson unnu fjórmenningsleikinn 2/1 – Hákon Örn Magnússon landaði einnig sigri í sinni viðureign.

Eftirtaldir leikmenn skipa karlalandslið Íslands:

• Aron Snær Júlíusson, GKG
• Dagbjartur Sigurbrandsson, GR
• Hákon Örn Magnússon, GR
• Hlynur Bergsson, GKG
• Kristófer Karl Karlsson, GM
• Sverrir Haraldsson, GM

Þjálfari Heiðar Davíð Bragason
Sjúkraþjálfari Baldur Gunnbjörnsson

Alls eru 13 þjóðir sem keppa á EM karla: Austurríki, Belgía, Danmörk, Frakkland, Þýskaland, Ísland, Írland, Ítalía, Holland, Portúgal, Spánn, Svíþjóð, Sviss.

2 keppnisdagur:

Ísland endaði í 12. sæti og leikur því um sæti 9.-13. en Portúgal komst beint áfram í undanúrslit í þessum riðli þar sem að liðin í sætum 10-13 leika í 1. umferðinni.

1 keppnisdagur:

Íslenska liðið er í 10. sæti eftir fyrsta keppnisdaginn á +4 samtals eða 359 höggum. Frakkland er á 12 höggum undir pari samtals, Holland er í öðru sæti á -6 samtals. Fimm bestu skorin telja í höggleikskeppninni. Aron Snær Júlíusson er á þriðja besta skorinu í einstaklingskeppninni en besta skor mótsins er -5.

Aron Snær Júlíusson 68 högg (-3)
Dagbjartur Sigurbrandsson 70 högg (-1)
Hlynur Bergsson 71 högg (par)
Kristófer Karl Karlsson 75 högg (+4)
Sverrir Haraldsson 75 högg (+4)

Hákon Örn Magnússon 79 högg (+8)

Staðan:

1. Frakkland 343 högg (-12)
2. Holland 349 högg (-6)
3.-4. Þýskaland 350 högg (-5)
3.-4. Svíþjóð 350 högg (-5)
5.-6. Belgía 352 högg (-3)
5.-6. Danmörk 352 högg (-3)
7.-8. Spánn 354 högg (-1)
7.-8. Sviss 354 högg (-1)
9. Portúgal 357 högg (+2)
10. Ísland 359 högg (+4)
11. Ítalía 360 högg (+5)
12. Austurríki 360 (+5)
13. Írland 367 högg (+12)

Nánari upplýsingar um mótið má nálgast hér: