Fjóla Margrét Viðarsdóttir, GS og Markús Marelsson, GK, kepptu alþjóðlega Opna unglingamótinu, The Junior Open championship, sem fram fór á Monifieth vellinum í Skotlandi.
Fjóla Margrét var einu höggi frá því að komast í gegnum niðurskurðinn á þessu sterka móti – og fékk dýrmæta reynslu á alþjóðlega keppnissviðinu. Fjóla Margrét lék á 86 og 81 höggi og var hún aðeins einu höggi frá niðurskurðinum fyrir þriðja keppnisdaginn.
Markús endaði í 25. sæti og lokahringurinn var glæsilegur þar sem hann lék á einu höggi undir pari vallar eða 71 höggi. Markús lék hringina þrjá á 77-80-71.
Sex efstu keppendur mótsins léku hringina þrjá undir pari vallar samtals. Sigurvegarinn, Connor Graham frá Skotlandi, lék á 13 höggum undir pari samtals.
Keppnisvöllurinn er í um 30 mínútna akstursfjarlægð frá St. Andrews vellinum þar sem að Opna mótið hefst á fimmtudag.
The Junior Open championship var sett á laggirnar árið 1994 og hefur R&A í Skotlandi verið framkvæmdaraðili mótsins frá árinu 2000.
Golfsamböndum sem eru undir hatti R&A er boðið að senda leikmenn 16 ára og yngri í þetta mót. R&A hefur gætt þess að The Junior Open championship fari alltaf fram á golfvelli sem er í næsta nágrenni við keppnisvöll The Open.
Smelltu hér fyrir rástíma, stöðu og úrslit mótsins.
