Golfklúbbur Mosfellsbæjar er Íslandsmeistari golfklúbba 2023 í 1. deild karla. Þetta er í fjórða sinn sem GM fagnar þessum titli en úrslitin réðust á Jaðarsvelli á Akureyri í dag.

Golfklúbbur Mosfellsbæjar og Golfklúbbur Akureyrar léku til úrslita þar sem að GM hafði betur 3-2 í spennandi leik. GA hefur ekki sigrað á þessu móti frá árinu 1998 þegar GA varð Íslandsmeistari í 8. sinn í sögu klúbbsins.

Golfklúbbur Reykjavíkur og Golfklúbbur Kópavogs og Garðabæjar léku um þriðja sætið og þar hafði GR betur, 3-2.

GM hafði betur gegn GKG í undanúrslitum 3,5-1,5. GA og GR mættust í hinum undanúrslitaleiknum. Þar réðust úrslitin í þremur leikjum af alls fimm eftir bráðabana – og tryggði Tumi Hrafn Kúld, GA, sigurinn í lokaviðureigninni á 25. holu.

 Smelltu hér til að nálgast stöðu leikja og allar umferðir í einu skjali.

Smelltu hér fyrir myndasafn frá mótinu:

Alls kepptu átta lið um Íslandsmeistaratitil golfklúbba 2023. Liðunum var skipt í tvo fjögurra liða riðla.

Hvert lið lék þrjá leiki í riðlakeppninni. Í hverri viðureign voru leiknir tveir fjórmenningsleikir og þrír tvímenningsleikir.

Tvö efstu liðin úr hvorum riðli komust í undanúrslit.

A-riðill lokastaða:
GKG, GA, GK, GOS.

GKG lék í undanúrslitum gegn GM, þar sem að GM hafði betur 3,5-1,5.

B-riðill lokastaða:
GR, GM, GS, GV.

GR og GA léku í undanúrslitum. Úrslitin réðust eftir bráðabana í þremur leikjum af alls fimm.

Lokastaðan í 1. deild karla 2023 á Íslandsmóti golfklúbba.

Golfklúbbur Kópavogs og Garðabæjar hafði titil að verja í karlaflokk í efstu deild.

Fyrst var leikið á Íslandsmóti golfklúbba í karlaflokki árið 1961. Frá þeim tíma hafa 6 klúbbar fagnað þessum titli.

Golfklúbbur Reykjavíkur hefur sigrað oftast eða 25 sinnum, þar á eftir kemur Golfklúbburinn Keilir með 15 titla, Golfklúbbur Akureyrar er með 8 titla, Golfklúbbur Kópavogs og Garðabæjar er með 8, Golfklúbbur Suðurnesja 3, og Golfklúbbur Mosfellsbæjar er með 4 titla, þar af 2 þegar klúbburinn var Golfklúbburinn Kjölur.

Íslandsmót golfklúbba GSÍ – Íslandsmeistarar frá upphafi

Karlaflokkur:

Fjöldi titla:

Golfklúbbur Reykjavíkur (25)
Golfklúbburinn Keilir (15)
Golfklúbbur Akureyrar (8)
Golfklúbbur Kópavogs og Garðabæjar (8)
Golfklúbbur Suðurnesja (3)
Golfklúbbur Mosfellsbæjar (4)