Guðrún Brá Björgvinsdóttir, atvinnukylfingur úr GK, keppir á Helsingborg Open mótinu sem fram fer á Allerum golfvellinum í Svíþjóð dagana 2.-4. júní.
Mótið hefst föstudaginn 2. júní og er það hluti af LET Evrópumótaröðinni, sem er í efsta styrkleikaflokki atvinnumótaraða í kvennaflokki í Evrópu.
Leiknar verða 54 holur á þremur keppnisdögum og er heildarverðlaunaféð á mótinu 300 þúsund Evrur. Par vallar er 72 og er heildarlengd vallar 5.800 metrar.
Þetta er fjórða mótið á tímabilinu hjá Guðrúnu Brá á LET Evrópumótaröðinni.
Hún endaði í 61. sæti á móti í Hollandi í síðustu viku þar sem hún lék á 219 höggum (+3) (72-74-73).
Smelltu hér fyrir rástíma, stöðu og úrslit frá Helsingborg Open.
Guðrún Brá hefur leik á 10. teig kl. 11:45 að íslenskum tíma eða 13:45 að staðartíma í Svíþjóð.
Tvesa Malik frá Indlandi og Lauren Taylor frá Englandi eru með þrefalda Íslandsmeistaranum í ráshóp.
