Guðrún Brá Björgvinsdóttir, GK, náði sínum besta árangri á tímabilinu á LET Access atvinnumótaröðinni í Frakklandi á móti sem fram fór dagana 12.-14. september.
Þrefaldi Íslandsmeistarinn úr Hafnarfirði varð fjórða á Hauts de France mótinu.
Guðrún Brá lék á 3 höggum undir pari samtals (71-70) en vegna veðurs var ein umferð felld niður.
Þetta var tíunda mótið á tímabilinu hjá Guðrúnu Brá á mótaröðinni sem er í næst efsta styrkleikaflokki atvinnumótaraða í Evrópu í kvennaflokki.
Framundan eru tvö síðustu mót tímabilsins en það næst síðasta fer fram dagana 18.-20. september í Frakklandi, Lavaux Ladies Open.
Guðrún Brá er á meðal keppenda á því móti og Ragnhildur Kristinsdóttir, GR, er einnig á keppendalistanum.
Guðrún Brá bætti stöðu sína verulega á stigalista LET Access mótaröðinni með árangri sínum í Frakklandi. Hún er sem stendur í 28. sæti stigalistans – en 30 efstu á þeim lista í lok tímabilsins þurfa ekki að fara í gegnum fyrsta stig úrtökumótsins fyrir LET Evrópumótaröðina í haust.
Ragnhildur er í 81. sæti stigalistans.
Fyrsta stig úrtökumótsins fyrir LET Evrópumótaröðina fer fram í Marokkó 10.-12. desember á Rotana vellinum við Marrakech.
Lokaúrtökumótið fer einnig fram í Marokkó – en það fer fram dagana 16.-20. desember – og verður leikið á tveimur völlum við borgina Marrakech, Al Maaden Golf og Royal Golf.
