Þrír íslenskir kylfingar taka þátt á einu sterkasta og virtasta unglingagolfmóti veraldar, German Boys & Girls Open.
Í stúlknaflokki taka 100 keppendur þátt og er mótið í efsta styrkleikaflokki á heimslista í stúlknaflokki. Hjá piltunum er mótið í þriðja efsta styrkleikaflokki og þar eru 100 keppendur.
Smelltu hér fyrir nánari upplýsingar um mótið.
Mótið fer fram á hinu glæsilega golfsvæði St. Leon-Rot, en þar eru tveir 18 holu keppnisvellir og stórglæsilegt æfingasvæði – sem er í fremstu röð á heimsvísu.
Gunnlaugur Árni Sveinsson, GKG, Perla Sól Sigurbrandsdóttir, GR og Sara Kristinsdóttir, GM, keppa á þessu móti. Ólafur Björn Loftsson, afrekssstjóri Golfsambands Íslands, er með í för.
Kylfingarnir hafa nýtt undanfarna tvo daga við æfingar en keppnin hefst fimmtudaginn 1. júní.
Fjölmargir þjálfarar frá bandarískum háskólum mæta á þetta mót til að fylgjast með – enda eru flestir bestu kylfingar veraldar í þessum aldursflokki að keppa á þessu móti. Árið 2019 voru yfir 40 þjálfarar frá Bandaríkjunum að fylgjast með mótinu
Þetta er í 19. sinn sem mótið fer fram. Keppnin er 54 holur og eru leiknar 18 holur þrjá daga í röð. Það er engin niðurskurður eftir 36 holur og fá allir keppendur því að leika þrjá hringi.
Báðir keppnisvellir golfsvæðisins Golf Club St. Leon-Rot verða notaðir á þessu mót. Keppendur eru alls 200, 100 piltar og 100 stúlkur.
Keppendur eru 18 ára og yngri, en eftir 2. keppnisdag eru veitt verðlaun fyrir sigur í aldursflokknum 16 ára og yngri.
Smelltu hér fyrir rástíma og lokastöðu:
Smelltu hér fyrir lifandi skor frá mótinu.
