Aron Snær Júlíusson ú GKG setti í dag vallarmet á Jaðarsvelli á Akureyri. Aron lék á 67 höggum eða -4 og er hann efstur í flokki 17-18 ára á Íslandsbankamótaröð GSÍ. Í þessum aldursflokki eru leiknar 54 holur á þremur keppnisdögum en aðrir aldursflokkar hefja leik á morgun, laugardag.
Heimamaðurinn Tumi Hrafn Kúld er annar á 71 höggu eða pari vallar og þar á eftir koma þeir Kristófer Orri Þórðarson úr GKG og Ernir Sigmundsson úr GR en þeir léku báðir á 73 höggum í dag. Egill Ragnar Gunnarsson úr GKG er á 74 höggum í fimmta sæti.
Í flokki 17-18 ára stúlkna er Íslandsmeistarinn í þessum flokki, Helga Kristín Einarsdóttir NK, efst en hún lék á 77 höggum eða +5. Þar á eftir koma þær Sigurlaug Rún Jónsdóttir, GK og Alexandra Eir Grétarsdóttir, GOS en þær lékui báðar á 79 höggum í dag.
