Íslandsmót eldri kylfinga fer fram á Jaðarsvelli hjá Golfklúbbi Akureyrar dagana 14.-16. júlí 2022.

Keppni hefst snemma að morgni fimmtudaginn 14. júlí og eru leiknar 54 holur á þremur keppnisdögum.

Keppt er í fjórum flokkum, 50 ára og eldri í kvennaflokki, 65 ára og eldri í kvennaflokki, 50 ára og eldri í karlaflokki og 65 ára og eldri í karlaflokki. Íslandsmeistarar í þessum fjórum flokkum verða krýndir á lokahófi mótsins laugardagskvöldið 16. júlí.

Keppendur eru alls 145. Þeir koma frá 23 mismunandi klúbbum víðsvegar af landinu.

Fimm klúbbar eru með keppendur í öllum flokkum í kvenna – og karlaflokki, GR, GK, GKG, GM og NK.

Flestir keppendur koma úr GR eða 41 alls, 22 úr GK, og 20 úr GKG. Níu klúbbar eru með einn keppenda, þrír eru með 2 keppendur, fimm klúbbar eru með þrjá keppendur, og sex klúbbar eru með 10 keppendur eða fleiri.

Flestir keppendur eru í karlaflokki 50 ára og eldri – eða 75 alls. Í þeim flokki eru keppendur frá 19 klúbbum. Í kvennaflokki 50 ára og eldri eru 36 keppendur og koma þeir frá 7 klúbbum. Í karlaflokki 65 ára og eldri eru 26 keppendur og koma þeir frá 11 klúbbum. Í kvennaflokki 65 ára og eldri eru 8 keppendur og koma þeir frá 5 klúbbum.

Smelltu hér fyrir rástíma á Íslandsmót eldri kylfinga 2022:

Smelltu hér fyrir stöðu og úrslit á Íslandsmóti eldri kylfinga 2022:

Smelltu hér fyrir myndasafn frá Íslandsmóti eldri kylfinga 2022:

Þórdís Geirsdóttir, GK, mætir í titilvörnina í flokki +50 ára í kvennaflokki og Sigurbjörn Þorgeirsson, GFB, sem sigraði í fyrra á Íslandsmóti eldri kylfinga í +50 ára flokki karla er einnig á meðal keppenda.

Guðrún Garðars, GR, er á meðal keppenda í +65 ára flokki kvenna en hún hefur titil að verja. Björgvin Þorsteinsson varð Íslandsmeistari í flokki +65 ára flokki karla í fyrra en hann lést í október 2021.

Meðalforgjöf karla í +50 ára og eldri flokknum er 6.7. Björgvin Sigurbergsson, GK, sem hefur sigrað fjórum sinnum á sjálfu Íslandsmótinu í golfi er með lægstu forgjöfina eða +1. Sigurbjörn Þorgeirsson, GFB, er með +0.6 og Halldór Sævar Birgisson, GHH er með 0.1. Þar á eftir koma þeir Tryggvi Valtýr Traustason, GSE, með 0.4 og Ólafur Hreinn Jóhannesson, GSE með 0.8.

Í kvennaflokki í +50 ára og eldri er meðalforgjöf keppenda 12.6. Þórdís Geirsdóttir, GK, er með lægstu forgjöfina eða 0.5 og þar á eftir kemur Anna Jódís Sigurbergsdóttir, GK, með 6.3 og Ásgerður Sverrisdóttir, GR, er með 6.5. Þórdís hefur einu sinni sigrað á sjálfu Íslandsmótinu í golfi, 1987. Ásgerður hefur tvívegis sigrað á Íslandsmótinu í golfi, 1983 og 1984. Steinunn Sæmundsdóttir, GR, sem er einnig á meðal keppenda sigraði á Íslandsmótinu árið 1986.

Keppt er í eftirtöldum flokkum:

Öldungaflokkur karla 50 ára og eldri – Hámarksforgjöf 18,0 – gulir teigar

Öldungaflokkur kvenna 50 ára og eldri – Hámarksforgjöf 26,0 – bláir teigar

Öldungaflokkur karla 65 ára og eldri – Hámarksforgjöf 22,0 – gulir teigar

Öldungaflokkur kvenna 65 ára og eldri – Hámarksforgjöf 29,0 – rauðir teigar

Í flokkum 65 ára og eldri er notkun golfbíla heimiluð.

Rástímar eru birtir í GolfBox – smelltu hér.

Ræst er út af 1. teig með 10 mínútna millibili.

Á fyrsta keppnisdegi er keppendum raðað út eftir forgjöfen alla aðra daga verður raðað út eftir skori. 

Ekki eru leyfðar breytingar á útgefnum rástímum eftir birtingu þeirra.

1. hringur, fimmtudagur: Áætlaðir rástímar frá klukkan 07:30 – 15:30

Rásröð: Konur 50+, Konur 65+, Karlar 50+, Karlar 65+

2. hringur, föstudagur: Rástímar frá klukkan 07:30 – 15:30

Rásröð: Karlar 50+, Karlar 65+, Konur 65+, Konur 50+

3. hringur, laugardagur: Rástímar frá klukkan 07:00 – 15:00

Rásröð: Karlar 65+, Konur 65+, Karlar 50+, Konur 50+

Verðlaun

Veitt verða verðlaun fyrir 1. – 3. sæti í flokki karla 50 ára og eldri og kvenna 50 ára og eldri án forgjafar.

1. sæti: 40.000,- kr. Gjafakort Icelandair

2. sæti: 30.000,- kr. Gjafakort Icelandair

3. sæti: 15.000,- kr. Gjafakort Icelandair

Veitt verða verðlaun fyrir 1. – 3. sæti í flokki karla 65 ára og eldri og kvenna 65 ára og eldri án forgjafar.

1. sæti: 40.000,- kr. Gjafakort Icelandair

2. sæti: 30.000,- kr. Gjafakort Icelandair

3. sæti: 15.000,- kr. Gjafakort Icelandair

Lokahóf fer fram á laugardagskvöldi í golfskálanum og verða verðlaun afhent þar.

Fyrir aukamiða hafið samband á skrifstofa@gagolf.is.

Matseðill:

Boðið verður upp á hlaðborð: 

Kremuð villisveppasúpa, brauð & smjér

Fiskréttur og lambakjöt og meðlæti: Kartöflur, rótargrænmeti, ferskt salat, döðlu & brokkolísalat, bearnaise og piparsósa, köld grillsósa + meira viðeigandi meðlæti með fisknum.

Eftirréttur:  Heit súkkulaði brownie,  vanillu créme brulée & fersk ber

Golfbílar

Í golfmótum á vegum GSÍ, að undanskildu Íslandsmóti eldri kylfinga, 65 ára og eldri, skal mótsstjórn aðeins veita þeim keppendum, sem framvísa vottorði frá tilnefndum trúnaðarlækni GSÍ, heimild til að nota golfbíl meðan á keppni stendur. Vottorðið skal staðfesta að keppandinn búi við langvarandi líkamlega fötlun og þurfi á golfbíl að halda við keppni, að því tilskildu að slíkt veiti keppandanum ekki ótilhlýðilegt forskot, sbr. undantekningu 1 við golfreglu 14-3. Trúnaðarlæknar GSÍ er Sveinbjörn Brandsson, sveinbjorn@orkuhusid.is og Valur Guðmundsson, valurgudm@gmail.com.

Umsókn um heimild til notkunar golfbíls skal senda mótanefnd GSÍ að minnsta kosti einni viku áður en mótið hefst. Umsóknin skal send til motanefnd@golf.is og henni skal fylgja afrit vottorðsins.

Mótsstjórn: Arnar Geirsson, Steindór Ragnarsson, Jón Heiðar Sigurðsson, Tryggvi Jóhannsson.

Netfang mótsstjórnar: arnar@golf.is

Dómari: Tryggvi Jóhannsson

Birt með fyrirvara um breytingar.