Íslandsmót unglinga í höggleik 2023 fyrir aldurshópinn 15-21 árs fer fram á Vestmannaeyjavelli hjá Golfklúbbi Vestmannaeyja dagana 18.-20. ágúst 2023.
Alls eru 79 keppendur skráðir til leiks. Keppt er í tveimur aldursflokkum í stúlkna og piltaflokki, 15-16 ára og 17-21 árs. Þetta er í fyrsta sinn sem keppt er í flokki 17-21 árs.
Keppendur koma frá 13 mismundandi klúbbum víðsvegar af landinu. Alls eru 26 stúlkur og 53 piltar. Hlutfall stúlkna er 33%.
Keppnisfyrirkomulagið er 54 holu höggleikur án forgjafar.
Meðalforgjöf keppenda er 4.3. Í piltaflokki er meðalforgjöfin 3.8 og í stúlknaflokki er meðalforgjöfin 5.3. Logi Sigurðsson, GS, nýkrýndur Íslandsmeistari í golfi í karlaflokki er á meðal keppenda en hann er með lægstu forgjöfina í mótinu eða +2.1
Smelltu hér fyrir rástíma, stöðu og úrslit:
Smelltu hér fyrir myndasafn frá mótinu í Vestmannaeyjum:
Piltaflokkur 15-16 ára:
Guðjón Frans Halldórsson er Íslandsmeistari í golfi 2023 í piltaflokki 15-16 ára. Guðjón lék á 208 höggum eða 2 höggum undir pari vallar. Guðlaugur Þór Þórðarsojn, GL, varð annar á 218 höggum og Gunnar Þór Heimisson, GKG, varð þriðji á 220 höggum.
Stúlknaflokkur 15-16 ára:
Pamela Ósk Hjaltadóttir, GM, er Íslandsmeistari unglinga 2023 í stúlknaflokki 15-16 ára. Pamela lék á 213 höggum eða 3 höggum yfir pari vallar og sigraði með 14 högga mun. Auður Bergrún Snorradóttir, GM, varð önnur á 227 höggum og Fjóla Margrét Viðarsdóttir, GS, varð þriðja á 229 höggum.
Piltaflokkur 17-21 árs:
Veigar Heiðarsson, GA, er Íslandsmeistari unglinga 2023 í piltaflokki 17-21 árs. Veigar lék á 199 höggum eða 11 höggum undir pari samtals. Logi Sigurðsson, GS, varð annar á 200 höggum eða 10 höggum undir pari og Svanberg Addi Stefánsson, GK, varð þriðji á 208 höggum eða 2 höggum undir pari.
Lokahringurinn var æsispennandi og frábært skor leit dagsins ljós hjá Veigar og Loga. Veigar fékk fimm fugla í röð á síðustu fimm holunum og tryggði sér Íslandsmeistaratitilinn með fugli á lokaholunni. Logi var nálægt því að jafna við Veigar en pútt Loga fyrir erni á 18. flötinni var hársbreidd frá því að fara ofaní.
Stúlknaflokkur 17-21 árs:
Sara Kristinsdóttir, GM, er Íslandsmeistari unglinga 2023 í stúlknaflokki 17-21 árs. Sara lék á 215 höggum (+5 samtals) og sigraði með átta högga mun. Berglind Erla Baldursdóttir, GM, varð önnur, og jafnar í 3.-4. sæti voru Helga Signý Pálsdóttir, GR og Elsa Maren Steinarsdóttir, GL.
Mótsstjórn ákvað að tvær umferðir voru leiknar laugardaginn 19. ágúst.
- Stúlknaflokkur 15-16 ára, hámarksforgjöf 17,0
- Stúlknaflokkur 17-21 árs, hámarksforgjöf 14,0
- Piltaflokkur 15-16 ára, hámarksforgjöf 13,0
- Piltaflokkur 17-21 árs, hámarksforgjöf 6,0
Flestir keppendur eru frá Golfklúbbi Kópavogs – og Garðabæjar og Golfklúbbi Mosfellsbæjar – en báðir klúbbar eru með 16 keppendur. GM er með hæsta hlutfallið í stúlknaflokki en tæplega 40% keppenda í stúlknaflokki eru frá Golfklúbbi Mosfellsbæjar. Í piltaflokki eru GKG og GR með hæsta hlutfallið eða báðir klúbbar eru með tæplega 21% af keppendafjöldanum.
| Klúbbur | Stúlkur | Piltar | Samtals | Hlutfall | Hlutfall stúlkna | Hlutfall pilta |
| Golfklúbbur Kópavogs og Garðabæjar | 5 | 11 | 16 | 20.25% | 19.23% | 20.75% |
| Golfklúbbur Mosfellsbæjar | 10 | 6 | 16 | 20.25% | 38.46% | 11.32% |
| Golfklúbbur Reykjavíkur | 4 | 11 | 15 | 18.99% | 15.38% | 20.75% |
| Golfklúbburinn Keilir | 1 | 6 | 7 | 8.86% | 3.85% | 11.32% |
| Golfklúbburinn Leynir | 1 | 6 | 7 | 8.86% | 3.85% | 11.32% |
| Golfklúbbur Akureyrar | 0 | 4 | 4 | 5.06% | 0.00% | 7.55% |
| Golfklúbbur Suðurnesja | 1 | 3 | 4 | 5.06% | 3.85% | 5.66% |
| Golfklúbbur Selfoss | 1 | 2 | 3 | 3.80% | 3.85% | 3.77% |
| Golfklúbbur Vestmannaeyja | 0 | 2 | 2 | 2.53% | 0.00% | 3.77% |
| Golfklúbburinn Setberg | 2 | 0 | 2 | 2.53% | 7.69% | 0.00% |
| Golfklúbbur Skagafjarðar | 1 | 0 | 1 | 1.27% | 3.85% | 0.00% |
| Golfklúbburinn Hamar Dalvík | 0 | 1 | 1 | 1.27% | 0.00% | 1.89% |
| Nesklúbburinn | 0 | 1 | 1 | 1.27% | 0.00% | 1.89% |
| 26 | 53 | 79 |
Verðlaun:
Veitt verða verðlaun fyrir 1. – 3. sæti í öllum flokkum. Ef keppendur eru jafnir í fyrsta sæti þá verður leikinn bráðabani en að öðru gilda móta- og keppendareglur GSÍ. Ef keppendur eru jafnir í öðrum sætum skiptast stig og verðlaun jafnt á milli þeirra keppenda. Verðlaunaafhending verður haldin strax að lokinni keppni í hverjum aldursflokki fyrir sig.
