Frétt af heimasíðu GR.
Nú er komið að því að kynna sjötta vinavöll okkar GR-inga fyrir komandi sumar, Kirkjubólsvöllur hjá Golfklúbbi Sandgerðis. Það mun vera í fyrsta sinn sem þessi golfklúbbar fara í samstarf og okkur þykir virkilega ánægjulegt að tilkynna félagsmönnum þennan nýja kost. Golfklúbbur Sandgerðis var stofnaður 24. apríl 1986 og hefur verið í stöðugri uppbyggingu síðan. Völlurinn er strandarvöllur, staðsettur að Vallarhúsum, sem liggur mitt á milli Sandgerðis og Garðs. Hjá Golfklúbbi Sandgerðis er öll sú þjónusta sem kylfingar óska eftir þegar vinavöllur er heimsóttur – glæsilegt klúbbhús sem býður upp á fyrsta flokks veitingar og púttflöt þar sem hægt er að æfa stutta spilið.
Sömu reglur gilda á Kirkjubólsvelli eins og öðrum vinavöllum GR fyrir sumarið 2016. Félagsmenn Golfklúbbs Reykjavíkur greiða kr. 1600 í vallargjald í hvert sinn er þeir leika Kirkjubólsvöll og skiptir þá ekki máli hvort leiknar séu 9 eða 18 holur. Áður en leikur hefst skulu félagar framvísa félagsskírteini sínu og greiða vallargjald í afgreiðslu. Samkomulagið gildir ekki ef félagsmenn leika með hópum, sem gert hafa sérstaka samninga um afslætti af vallargjöldum, eins og t.d fyrirtækjamót.
Útbúinn verður bókunarlinkur á síðu GR á www.golf.is undir rástímar – vellir.
Með þessari frétt hefur Golfklúbbur Reykjavíkur tilkynnt sex vinavelli fyrir komandi sumar en þeir eru Hústóftarvöllur Grindavík, Garðavöllur Akranesi, Hamarsvöllur Borgarnesi, Svarfhólsvöllur Selfossi, Strandarvöllur á Hellu og nú Kirkjubólsvöllur í Sandgerði. Sjöundi vinavöllur GR verður tilkynntur í næstu viku.
Á meðfylgjandi mynd má sjá Ómar Örn Friðriksson, framkvæmdarstjóra GR og Jónatan M. Sigurjónsson, formann GSG við undirritun samnings.
Kær kveðja,
Golfklúbbur Reykjavíkur