Gunnar Kristinn. Gunnarsson fyrrv. framkvæmdastjóri lést 4. september síðastliðinn á Heilbrigðisstofnun Suðurlands í Vestmannaeyjum, 74 ára að aldri.
Gunnar fæddist í Reykjavík 21. febrúar 1950, sonur hjónanna Gunnars Kristinssonar, verslunarmanns og söngvara, og Maríu Tryggvadóttur tannsmiðs.
Eftirlifandi eiginkona Gunnars er Sigrún Inga Sigurgeirsdóttir fyrrverandi bókavörður. Börn þeirra eru María Kristín, Gunnar Geir og Inga Lilý. Barnabörnin eru sjö.
Gunnar útskrifaðist sem viðskiptafræðingur 1974 frá Háskóla Íslands. Hann var um tveggja áratuga skeið framkvæmdastjóri Heilbrigðisstofnunarinnar í Vestmannaeyjum starfaði þar til ársins 2014 þar til eiginlegri starfsævi lauk.
Gunnar var virkur í félagsstörfum innan íþróttahreyfingarinnar. Hann sat í fjölda ára í stjórn handknattleiksdeildar Þróttar í Reykjavík og í stjórn HSÍ 1980-1984 og 1987-1992. Hann var m.a. framkvæmdastjóri heimsmeistaramótsins í handbolta sem fram fór á Íslandi árið 1995, og var eftirlitsdómari í þeirri íþrótt um margra ára skeið hér á landi og erlendis á vegum EHF.
Gunnar var einnig virkur félagi í Oddfellow í Vestmannaeyjum, var m.a. yfirmeistari sinnar stúku og stórfulltrúi stúkunnar fram að andláti.
Golfhreyfingin fékk að njóta krafta Gunnars um margra ára skeið.
Gunnar var formaður Golfklúbbs Vestmannaeyja 1996-2000 og sat í stjórn Golfsambands Íslands 2001-2019. Hann hlaut gullmerki HSÍ, GSÍ og ÍSÍ og silfurmerki ÍBV.
Fallinn er frá mikill heiðursmaður sem skilur eftir sig stórt skarð í golfhreyfingunni. Hans verður sárt saknað.
Golfsamband Íslands vottar aðstandendum innilegrar samúðar.
Gunnar verður jarðsunginn frá Landakirkju í Vestmannaeyjum, laugardaginn 14. september kl. 13.
Nánar um streymi frá útförinni á vef Landakirkju – smelltu hér:
