– Guðrún Brá lék vel en á brattann að sækja hjá Íslandi
Fyrsta keppnisdegi á Evrópumóti kvennalandsliða í golfi er lokið á Urriðavelli. Bestu áhugakylfingar Evrópu eru þar mættir til leiks. Alls eru 20 þjóðir með lið í þessari keppni og 120 kylfingar sem mættir eru til leiks.
Keppnisfyrirkomulagið á EM er með þeim hætti að leiknar eru 36 holur fyrstu tvo keppnisdagana og telja fimm bestu skor af alls sex í hverri umferð. Þjóðunum er að því loknu skipt upp í A, B og C riðil þar sem leikin er holukeppni. Í A-riðli leika þjóðirnar sem enduðu í 1.-8. sæti í höggleiknum, í B-riðli leika þjóðirnar í sætum 9.-16. og í C-riðli leika þjóðirnar sem eru þar fyrir neðan.
Noregur kom verulega á óvart á fyrsta keppnisdeginum og er með átta högga forskot á Englendinga og ellefu högga forskot á Spánverja. Noregur lék samtals á +2 sem er ótrúlega gott skor. Evrópumeistaralið Frakka er í fjórða sæti á +14 samtals og þar á eftir koma Danir, Þjóðverjar, og Finnar á +15.
Eins og áður segir hefur Evrópumeistaralið Frakka titil að verja. Frakkar hafa unnið þessa keppni undanfarin tvö ár.
Maria Parra Luque frá Spáni er í efsta sæti í einstaklingskeppninni á -3 eða 69 höggum. Luque er í fjórða sæti heimslistans í golfi áhugamanna en hún er með +4.5 í forgjöf.
Stina Resen frá Noregi er önnur á -2 og þar á eftir koma fjórir kylfingar á -1.
Íslenska liðið náði sér ekki á strik á fyrsta hringnum en Ísland lék samtals á 392 höggum eða +32. Guðrún Brá Björgvinsdóttir lék best í íslenska liðinu eða á 73 höggum eða +1. Skor íslenska landsliðsins var eftirfarandi:
Guðrún Brá Björgvinsdóttir 73 (+1)
Sunna Víðisdóttir 77 (+5)
Anna Sólveig Snorradóttir 77 (+5)
Signý Arnórsdóttir 82 (+10)
Ragnhildur Kristinsdóttir 83 (+11)
Berglind Björnsdóttir 86 (+14)
Úrslit síðustu ára á EM kvenna:
- 2015 Helsingør, Danmörk.
Evrópumeistarar Frakkland – Ísland 19. sæti. - 2014 Ljubljana, Slóvenía.
Evrópumeistarar Frakkland – Ísland 16. sæti. - 2013 Fulford, England.
Evrópumeistarar Spánn – Ísland 17. sæti. - 2011 Murhof, Austurríki.
Evrópumeistarar Svíþjóð – Ísland 16. sæti. - 2010 La Manga Club, Spánn.
Evrópumeistarar Svíþjóð – Ísland 17. sæti. - 2009 Bled, Slóvenía.
Evrópumeistarar Þýskaland – Ísland 16. sæti. - 2008 Stenungsund, Svíþjóð.
Evrópumeistarar Svíþjóð – Ísland tók ekki þátt. - 2007 Castelconturbia, Ítalía.
Evrópumeistarar Spánn – Ísland tók ekki þátt. - 2005 Karlstad, Svíþjóð.
Evrópumeistarar Spánn – Ísland 15. sæti. - 2003 Frankfurter, Þýskaland.
Evrópumeistarar Spánn – Ísland tók ekki þátt. - 2001 Golf de Meis, Spánn.
Evrópumeistarar Svíþjóð – Ísland 16. sæti. - 1999 St Germain, Frakkland.
Evrópumeistarar England – Ísland tók ekki þátt - 1997 Nordcenter G&CC, Finnland.
Evrópumeistarar Svíþjóð – Ísland tók ekki þátt. - 1995 Milano, Ítalía.
Evrópumeistarar Spánn – Ísland 17. sæti. - 1993 Royal Hague, Holland.
Evrópumeistarar Svíþjóð – Ísland 16. sæti.
