Ólafía Þórunn Kristinsdóttir, atvinnukylfingur úr Golfklúbbi Reykjavíkur, endaði í 56. sæti á LPGA móti í Bandaríkjunum. Mótið heitir Marathon Classic og fór fram í Sylvania í Ohio.
Ólafía lék hringina fjóra á 284 höggum (70-68-71-75) eða pari vallar samtals. Thidapa Suwannapura frá Taílandi sigraði á -14 eftir bráðabana gegn Brittany Lincicome frá Bandaríkjunum.
Mótið fer fram á Highland Meadows Golf Club – og á mótið sér langa sögu. Keppt var fyrst árið 1984.
In-Kyung Kim frá Suður-Kóreu hefur titil að verja en hún fagnaði sínum öðrum sigri á LPGA mótaröðinni á þessu móti í fyrra.
