Ólafía Þórunn Kristinsdóttir úr GR og Valdís Þóra Jónsdóttir úr Leyni eru í ágætri stöðu í úrtökumóti á lokastigi fyrir keppnisrétti á evrópsku mótaröð kvenna. Eftir þrjá hringi eru okkar konur jafnar í 41. -50. sæti á samtals pari.
Ólafía lék hringinn í dag á 73 höggum eða einu höggi yfir pari. Hún lék á Samanah vellinum í dag og fékk þrjá fugla og fjóra skolla.
Valdís Þóra lék á Amelkis vellinum og lék hringinn á 74 höggum eða tveimur höggum yfir pari. Valdís fékk sex fugla, fjóra skolla og tvo tvöfalda skolla.
Staðan hjá okkar konum er ágæt því eftir fjórða hring komast 60 efstu kylfingarnir í gegnum niðurskurðinn. 30 efstu að loknum fimm hringjum hljóta fullan keppnisrétt á evrópsku mótaröð kvenna á næstu leiktíð.
