Opna breska áhugamannamótið fer fram dagana 7.-12. júní en mótið er eitt sterkasta áhugamannamót í kvennaflokki á heimsvísu og fer það nú fram í 118. sinn. Leikið á Kilmarnock, Barassie, í Skotlandi.
Keppnisfyrirkomulagið er með þeim hætti að leiknar eru 36 holur með höggleiksfyrirkomulagi – 64 efstu kylfingarnir komast áfram í næstu umferð þar sem að holukeppni tekur við. Í holukeppninni eru leiknar 18 holur í hverri umferð en úrslitaleikurinn er 36 holur.
Þrír íslenskir keppendur frá Íslandi tóku þátt og komust þær allar í gegnum höggleikskeppnina þar sem að 64 efstu af alls 95 keppendum fóru áfram.
Jóhanna Lea Lúðvíksdóttir, GR, komst í morgun áfram í 16-manna úrslit keppninnar þegar hún sigraði Hazel Macgarvie frá Skotlandi í morgun 2/1 í 32-manna úrslitum. Jóhanna Lea mætir Emily Toy frá Skotlandi í dag í 4. umferð en Toy endaði í 5. sæti í höggleikskeppninni.
Jóhanna Lea mætti Huldu Clöru Gestsdóttur, GKG, í 1. umferð og hafði þar betur 2/0 í hörkuleik – og komst þar með í 2. umferð keppninnar.
Jóhanna Lea endaði í 53. sæti í höggleikskeppninni en Hulda Clara varð í 12. sæti í höggleiknum.
Ragnhildur Kristinsdóttir, GR, náði þeim einstaka árangri að leika best allra í höggleikskeppninni og er það í fyrsta sinn sem íslenskur áhugakylfingur nær þeim árangri. Ragnhildur mætti Aine Donagan frá Írlandi í 1. umferð en Donagan endaði í 64. sæti í höggleikskeppninni. Donagan sigraði Ragnhildi 4/3.
Mótið er hluti af keppnisdagskrá R&A í Skotlandi og sigurvegarinn fær tækifæri til þess að leika á risamótum á atvinnumótaröðum í kvennaflokki.
Ragnhildur lék gríðarlega vel á öðrum keppnisdeginum en hún lék á 66 höggum eða 7 höggum undir pari vallar. Hún lék samtals á 74-66 höggum eða 6 höggum undir pari vallar. Hulda Clara Gestsdóttir, GKG, lék hringina tvo á 77-72 höggum eða 4 höggum yfir pari samtals. Hún endaði í 12. sæti í höggleikskeppninni. Jóhanna Lea Lúðvíksdóttir, GR, lék samtals á 11 höggum yfir pari 81-76 sem skilaði henni í 53. sæti og er hún líka og Ragnhildu og Hulda Clara komin áfram í holukeppnina.
Sigurvegarinn fær keppnisrétt á fjórum risamótum hjá atvinnukylfingum, AIG mótinu, Opna bandaríska meistaramótinu, Evian meistaramótinu og Augusta National meistaramótinu.
