Perla Sól Sigurbrandsdóttir, frá Golfklúbbi Reykjavíkur, tók þátt á mjög sterku alþjóðlegu móti í Frakklandi sem fram fór dagana 14.-18. apríl.
Mótið heitir French International Lady Juniors Championship og voru keppendur 21 árs og yngri.
Perla Sól, sem er fædd árið 2006, var á biðlista fyrir mótið en komst inn á keppendalistann skömmu fyrir mótið.
Eins og áður segir var styrkleiki mótsins mjög hár en 70 af 100 keppendum mótsins eru á meðal 1000 efstu á heimslista áhugakylfinga. Forgjöf keppenda var einnig mjög lág en 91 af 100 keppendum er með + forgjöf.
Keppnisfyrirkomulagið var 36 holu höggleikur og komust 32 efstu í næstu umferð þar sem að holukeppni tók við af höggleiknum.
Perla Sól var því á meðal þeirra yngstu á keppendalistanum en hún lék samtals á +10 eða 75 og 77 höggum og endaði hún í 79. sæti.
Amalie Leth-Nissen stóð uppi sem sigurvegari en hún sigraði Paula Martin Sampedro frá Spáni í úrslitaleiknum 5/3.
