Alls eru 12 íslenskir landsliðskylfingar við nám í Bandaríkjunum þar sem þeir leika samhliða með háskólaliði. Kylfingarnir leika allir í NCAA I deild eða efstu deild, 6 karlar og 6 konur.
Hér er samantekt frá mótum sem fram fóru 22.-28. apríl 2022.
Jóhanna Lea Lúðvíksdóttir, Birgir Björn Magnússon, Daníel Ísak Steinarsson, Sverrir Haraldsson, Sigurður Bjarki Blumenstein, Hulda Clara Gestsdóttir og Ragnhildur Kristinsdóttir koma við sögu í þessari samantekt.
Ragnhildur Kristinsdóttir lék ekki í þessari viku en hún fékk þær frábæru fréttir í vikunni að hún í hópi þeirra 36 keppenda sem valdir voru til þess að spila í svæðiskeppninni (Regionals). Leikmennirnir sem valdir voru koma allir frá skólaliðum sem komust ekki með lið sín í svæðiskeppnina (Regionals). Ragnhildur mun því keppa í einstaklingskeppninni á því móti sem fram fer 9.-11. maí. Ragnhildur lék mjög vel á tímabilinu og er í sæti nr. 203 á landsvísu í kvennaflokki í háskólagolfinu – og sá árangur tryggði henni keppnisrétt á svæðismótinu.
Hulda Clara Gestsdóttir, Íslandsmeistari í golfi 2021, lék á Summit League meistaramótinu sem fram fór dagana 24.-26. apríl. Hulda Clara, sem keppir fyrir Denver háskólann, endaði í 4. sæti á +6 samtals (75-71-76) 222 högg. Denver-háskólaliðið stóð uppi sem sigurvegari í liðakeppninni og liðið mun leika til úrslita á svæðismótinu (Regionals) sem fram fer dagana 9.-11. maí.
Nánar um mótið hjá Huldu Clöru hér:
Birgir Björn Magnússon keppti á MVC Championship sem fram fór dagana 24.-26. apríl á Country Club / Paducah. Birgir Björn, sem keppir fyrir Southern Illinois skólann endaði í 10. sæti á +8 samtals (74-73-77) 224 högg. Í liðakeppninni sigraði Southern Illinois og fer Birgir Björn því áfram með liðsfélögum sínum í svæðiskeppnina (Regionals-mótið) sem fram fer dagana 16.-18. maí.
Nánar um mótið hjá Birgi Birni hér:
Hlynur Bergsson keppti á C-USA Men’s Golf meistaramótinu sem fram fór dagana 25.-28. apríl á
Texarkana Country Club. Hlynur, sem keppir fyrir North Texas háskólann endaði í 26. sæti á +4 samtals (72-73-75) 220 högg.
Daníel Ísak Steinarsson lék með UT Arlington skólanum á Sun Belt Conference sem fram fór dagana 24.-26. apríl á Mystic Creek vellinum. Daníel Ísak endaði í 34. sæti á +15 samtals (73-80- 78) 231 högg. UT Arlington skólinn komst áfram í holukeppni þar sem að fjögur efstu liðin léku um sæti í svæðismótinu (Regionals). UT Arlington tapaði fyrir Little Rock í undanúrslitum og komst ekki á svæðismótið (Regionals). Daníel Ísak sigraði í sinni viðureign á móti Anton Albers frá Þýskalandi. Anton er í 98. sæti á heimslista áhugamanna og var besti leikmaður mótsins.
Sverrir Haraldsson lék fyrsta og þriðja hringinn á þessu móti með Appalachian State háskólaliðinu. Sverrir var hvíldur á 2. keppnisdegi og lauk því ekki keppni í einstaklingskeppninni.
Nánar um mótið hjá Daníel og Sverri hér:
Jóhanna Lea Lúðvíksdóttir lék á MAC Championship sem fram fór dagana 22.-24. apríl á Stone Oak Country Club. Jóhanna, sem keppir fyrir Northern Illinois háskólaliðið endaði í 9. sæti á +14 (82-74-74) 230 högg. Í liðakeppninni endaði Northern Illinois liðið í öðru sæti.
Nánar um mótið hjá Jóhönnu Leu hér:
Sigurður Bjarki Blumenstein keppti á CAA Conference mótinu sem fram fór 24.-26. apríl á Dataw Island Club-Cotton Dike vellinum. Sigurður Bjarki, sem keppir fyrir James Madison skólann, endaði í 35. sæti á +13 samtals (72-77-80) 229 högg.
Nánar um mótið hjá Sigurði Bjarka hér:
Háskólagolf í Bandaríkjunum – nokkrir punktar.
Fjölmargir háskólar í Bandaríkjunum bjóða upp á keppni í golfi. Háskólarnir ákvarða í hvaða deild þeir taka þátt (það er ekki hægt að komast upp um deild eða falla niður).
Þrjú mismunandi samtök standa fyrir mótahaldi þar sem NCAA (National Collegiate Athletic Association) er langstærst. NCAA skiptist í þrjá hluta og aðgreinist fyrst og fremst af áherslum hvers skóla til íþrótta. NCAA I býður upp á bestu möguleika á íþróttastyrkjum og skólarnir þar leggja almennt mikið fjármagn til íþrótta. NCAA II býður upp á lægri íþróttastyrki en NCAA I og NCAA III býður ekki upp á neina íþróttastyrki.
1180 skólar bjóða upp á golf í karlaflokki og 982 í kvennaflokki (tölur frá 2020).
| Karlar | Konur | |
| NCAA I | 301 skólar | 270 skólar |
| NCAA II | 221 skóli | 198 skólar |
| NCAA III | 312 skólar | 248 skólar |
| NAIA | 177 skólar | 171 skóli |
| NJCAA | 169 skólar | 95 skólar |
12 íslenskir landsliðskylfingar leika í háskólaliði í Bandaríkjunum, 6 karlar og 6 konur. Kylfingarnir leika allir í NCAA I.
Í háskólagolfi er annars vegar leikið á haustönn frá september til nóvember og hins vegar á vorönn frá febrúar til apríl. Skólarnir taka alla jafna þátt í 11-13 golfmótum á ári (um það bil 5 á haustönn og 6-8 á vorönn). Mjög mikill munur er á styrkleika mótanna þar sem þau sterkustu eru á pari við sterkustu golfmót heims á meðal áhugakylfinga.
Hvert skólalið sendir 5 kylfinga til keppni í senn og er það alfarið undir þjálfara hvers liðs hvaða kylfingar verða fyrir valinu. Að meðaltali eru 10 kylfingar í hverju háskólaliði hjá körlum og 8 í hverju liði hjá konum. Það er því mikil samkeppni að vera einn af 5 kylfingum sem tekur þátt í hverju móti. Því sterkari sem skólinn er því meiri samkeppni. Flestir þjálfarar láta kylfinga sína keppa innbyrðis á milli móta í undankeppni (e. qualifying) þar sem bestu kylfingarnir vinna sér inn þátttökurétt í næsta móti. Algengt er þó að þjálfarinn láta kylfingana keppa um 3-4 sæti og velji 1-2 kylfinga sjálfur. Þessu er háttað með mjög fjölbreyttum hætti á milli skóla og jafnvel breytilegt hjá sama þjálfaranum eftir aðstæðum.
Háskólamótin eru langflest leikin með höggleiksfyrirkomulagi yfir 54 holur en í undantekningartilvikum er leikið með holukeppnisfyrirkomulagi. Algengast er að mótin standa yfir í tvo daga þar sem leiknar eru 36 holur fyrri daginn og 18 holur seinni daginn en einnig eru mót þrír dagar þar sem 18 holur eru leiknar á hverjum degi. Keppt er bæði í liða- og einstaklingskeppni í hverju móti.
Stundum gefst þjálfara tækifæri að senda fleiri en 5 kylfinga til keppni. Í þeim tilvikum velur þjálfarann 5 leikmenn sem keppa fyrir hönd skólans sem lið og aðrir leikmenn taka eingöngu þátt í einstaklingskeppninni. Ef leikmenn spila sem einstaklingar þá eru þeir merktir með (‡) fyrir aftan nafn þeirra. Þetta er mjög misjafnt eftir mótum.
Deildarkeppni
Þegar að hefðbundna tímabilinu lýkur í apríl hefst eiginleg úrslitakeppni. Í háskólamótum keppa skólar innbyrðis óháð í hvaða deild þeir eru en í lok apríl fer fram eitt golfmót þar sem skólar keppa í deildarkeppni (e. Conference Championship). Hjá körlunum er 31 deild og því fara fram 31 mót þar sem krýndir eru deildarmeistarar (e. Conference Champions). Hjá konunum eru 26 deildir og því fara fram 26 mót þar sem krýndir eru deildarmeistarar (e. Conference Champions).
Svæðiskeppni
Sá skóli sem sigrar sína deild vinnur sér inn þátttökurétt á næsta stig úrslitakeppninnar þar sem 6 svæðismót (e. Regionals) fara fram á sama tíma um miðjan maí víðs vegar um Bandaríkin. Samtals taka 84 skólar þátt í því móti hjá körlum og 72 skólar hjá konum. 14 skólar á hverjum stað í karlaflokki og 12 skólar á hverjum stað í kvennaflokki.
Það eru tvær leiðir fyrir hvern skóla að tryggja sér þátttökurétt í svæðismótinu, annars vegar með að vinna deildarkeppnina og hins vegar með góðum árangri yfir allt tímabilið. Árangur allra liðanna í deildinni er borinn saman og er skólunum raðað niður á lista sem ákvarðar hvaða skólar fá boð í mótið. Þessi listi er uppfærður vikulega yfir tímabilið þar sem hægt er að fylgjast með framgangi mála.
Deildarkeppnirnar eru afar misjafnar í styrkleika. Sumar eru afar sterkar þar sem flestir skólarnir hafa tryggt sér þátttökurétt í svæðismótinu í gegnum góðan árangur á tímabilinu. Aðrar eru mjög veikar þar sem enginn skóli tryggir sér þátttökurétt í svæðismótinu í gegnum árangur tímabilsins. Það er ekki jafnt gefið og hvað þetta varðar er kostur að vera meðlimur í veikri deild til að eiga sem bestan möguleika á að komast í svæðismótið.
Það er breytilegt eftir árum hvaða árangri skóli þarf að ná til að tryggja sér þátttökurétt í svæðismóti í gegnum árangur tímabilsins (fer eftir úrslitum deildarkeppnanna) en almennt komast allir skólar í svæðismótið sem enda á meðal 67 efstu í karlaflokki og 55 efstu í kvennaflokki (breytist alla jafna ekki mikið milli ára).
Hérna má sjá stöðuna eins og hún er í dag.
Karlar:
Konur:
Kylfingar eiga alltaf möguleika að komast í svæðiskeppnina og keppa þar sem einstaklingar ef skólinn þeirra komst ekki inn. Það er annars vegar mögulegt með góðum árangri á tímabilinu og hins vegar kemst sá kylfingur sem náði besta árangri í sinni deildarkeppni alltaf í svæðiskeppnina. 30 einstaklingar í karlaflokki og 36 einstaklingar í kvennaflokki bætast við í svæðiskeppnina hvert ár.
Landskeppni
Úrslitamótið fer fram um mánaðamótin maí/júní þar sem 30 skólar keppa í karlaflokki og 24 í kvennaflokki.
5 efstu skólarnir í karlaflokki og 4 efstu skólarnir í kvennaflokki úr hverri svæðiskeppni tryggja sér þátttökurétt í landskeppninni (e. National Championship). Fyrst er leikið með höggleiksfyrirkomulagi (72 holur) þar sem annars vegar er keppt um einstaklingstitilinn og hins vegar er keppt um að enda á meðal 8 efstu sætanna í liðakeppninni. Í seinni hluta mótsins er keppt í holukeppni með útsláttarfyrirkomulagi. 8 skólar keppa þangað til einn skóli stendur eftir sem sigurvegari (e. National Champions).
Tveir einstaklingskylfingar úr hverju svæðismóti vinna sér jafnframt inn þátttökurétt í Landskeppnina (bestu kylfingarnir af þeim kylfingum sem komust ekki áfram með sínum skóla).
Þekktir fyrrum sigurvegarar í Landskeppninni
Karlar
Jack Nicklaus (1961), Ben Crenshaw (1971, 1972, 1973), Phil Mickelson (1989, 1990, 1992), Tiger Woods (1996), Luke Donald (1999), Charles Howell III (2000), Thomas Pieters (2012), Max Homa (2013), Bryson DeChambeau (2015), Matthew Wolff (2019)
Konur
Pat Hurst (1989), Annika Sörenstam (1991), Charlotte Sörenstam (1993), Grace Park (1999), Stacy Lewis (2007), Caroline Hedwall (2010).