Íþrótta – og Ólympíusamband Íslands vekur athygli á því að starfandi er samskiptaráðgjafi íþrótta- og æskulýðsstarfs, sem allir innan íþrótta- og æskulýðsstarfs geta leitað til og nýtt sér þá þjónustu sem hann veitir, án endurgjalds. Þess má geta að samskiptaráðgjafi starfar óháð íþrótta- og æskulýðsfélögum og samtökum. Þetta kemur fram í tilkynningu frá ÍSÍ.

Samskiptaráðgjafinn tók til starfa vorið 2020 eftir að mennta- og menningarmálaráðuneytið setti lög um starfið haustið áður. Samskiptaráðgjafi hefur það markmið að auka öryggi í íþrótta- og æskulýðsstarfi barna, ungmenna og fullorðinna. Markmiðið er að allir geti tekið virkan þátt á sínum vettvangi og jafnframt leitað sér aðstoðar eða leitað réttar síns vegna atvika og misgerða sem hafa átt sér stað án þess að óttast afleiðingar.

Þjónusta og ráðgjöf samskiptaráðgjafa stendur öllum þeim til boða sem tilheyra skipulögðu íþrótta- og æskulýðsstarfi á landinu. Til samskiptaráðgjafa er hægt að leita með mál er varða andlegt-, líkamlegt- og kynferðislegt ofbeldi og áreitni, einelti og önnur sambærileg tilvik sem hafa komið upp á vettvangi íþrótta- eða æskulýðsstarfs.

Starfi samskiptaráðgjafa sinnir Sigurbjörg Sigurpálsdóttir sem er klínískur sálfræðingur með aðsetur í húsnæði Domus Mentis – Geðheilsustöðvar. Hægt er að hafa beint samband við hana og er hún með símatíma alla þriðjudaga kl. 10-11, í síma 839-9100. Utan þess tíma er hægt að hringja í símanúmerið en ekki alltaf öruggt að ná samtali. Einnig er hægt að senda tölvupóst á sigurbjorg@dmg.is sem verður svarað eins fljótt og hægt er eða senda inn tilkynningu í gegnum heimasíðuna www.samskiptaradgjafi.is.

Eftir samtal eða fyrstu samskipti við samskiptaráðgjafa er boðið upp á viðtal ef málið varðar áreitni, ofbeldi eða einelti. Þá er frekari upplýsinga aflað og í kjölfarið eru næstu skref ákveðin, ávallt í samráði við þann sem leitar til samskiptaráðgjafa. Einnig er hægt að leita eftir ráðgjöf hjá samskiptaráðgjafa, ekki þarf að fara lengra með mál ef viðkomandi kýs það ekki.

Samskiptaráðgjafi er óháður aðili sem getur aðstoðað og leiðbeint einstaklingum sem telja sig hafa verið beittir ofbeldi eða misrétti í íþrótta- eða æskulýðsstarfi. Þjónusta samskiptaráðgjafa er gjaldfrjáls.

Heimasíða samskiptaráðgjafa er https://www.samskiptaradgjafi.is/ og þjónar hún sem upplýsinga- og fræðslusíða starfsins. Hægt er að setja sig í samband við samskiptaráðgjafa í gegnum síðuna, tilkynna atvik og fá ráðgjöf eða aðrar upplýsingar.

Meðfylgjandi er lógó samskiptaráðgjafa, sem tilvalið er að setja á heimasíðu ykkar sem tengil sem leiðir inn á heimasíðu ráðgjafans.

Einnig er gagnlegt fræðsluefni varðandi kynferðislega áreitni og ofbeldi inni á heimasíðu ÍSÍ: https://isi.is/fraedsla/kynferdisleg-areitni-og-ofbeldi/

Það er afar áríðandi að ofangreindar upplýsingar skili sér til allra aðila innan íþróttahreyfingarinnar, það er iðkendur, þjálfara, aðra starfsmenn, stjórnarfólk, foreldra, forsjáraðila sem og annarra sem koma að starfinu með einum eða öðrum hætti.

Við biðlum til ykkar að koma þessum skilaboðum áfram í hreyfingunni og ítrekum mikilvægi þess að um þetta ríki almenn vitneskja í hreyfingunni.

Ofbeldi er ekki liðið í íþróttahreyfingunni!