Valdís Þóra Jónsdóttir úr Golfklúbbnum Leyni á Akranesi náði sínum þriðja besta árangri á LET Evrópumótaröðinni á móti sem fram fór í Suður-Afríku.
Valdís Þóra var í baráttunni um sigurinn á lokahringnum en hún endaði í 7. sæti. Hún lék hringina þrjá á -2 (72-70-72) eða 214 höggum. Alice Hewson frá Englandi sigraði á -5 samtals (70-70-71).
Valdís Þóra hefur tvívegis náð þriðja sæti á LET Evrópumótaröðinni og einu sinni hefur hún endað í fimmta sæti.
Fyrir árangurinn fékk Valdís Þóra rúmlega 4.500 Evrur eða rétt rúmlega 700.000 kr. Hún er í 24. sæti á stigalista LET Evrópumótaraðarinnar að loknum þremur mótum.
Guðrún Brá Björgvinsdóttir (GK) lék einnig á þessu móti. Íslandsmeistarinn 2019 lék á 80-71 höggi og komst hún ekki í gegnum niðurskurðinn.
Keppt er í Suður-Afríku að þessu sinni en mótaröðin hóf keppnistímabilið í Ástralíu.
Guðrún Brá hefur leikið á þremur mótum á þessari mótaröð á þessu tímabili sem er sú næst sterkasta í Evrópu. Besti árangur hennar er 65. sæti.
Valdís Þóra hefur einnig leikið á þremur mótum á LET Evrópumótaröðinni á þessu ári. Hún endaði í 21. sæti á öðru mótinu sem fram fór í Ástralíu eins og áður segir.
