Valdís Þóra Jónsdóttir úr Golfklúbbnum Leyni á Akranesi hefur lokið keppni á NSW Open mótinu á Coffs Harbour vellinum í Ástralíu. NSW Open er hluti af LET Evrópumótaröðinni sem er sterkasta atvinnumótaröð kvenna í Evrópu.
Íslandsmeistarinn 2017 lék tvo fyrstu hringina á +5 samtals (76-71) og endaði í 67. sæti. Valdís var tveimur höggum frá því að komast í gegnum niðurskurðinn.
Valdís Þóra náði frábærum árangri um s.l. helgi þar sem hún varð í þriðja sæti á Ladies Classic Bonville mótinu sem fram fór í Ástralíu. Valdís Þóra lék hringina fjóra á -7 samtals eða 281 höggi (69-70-72-70).
NSW mótið er fjórða mótið í röð hjá Valdísi Þóru á LET Evrópumótaröðinni á þessu ári en öll mótin fara fram í Ástralíu. Íslandsmeistarinn 2017 tók einnig þátt á LPGA móti í febrúar og er mótið því fimmta mótið í röð hjá Valdísi Þóru í þessari keppnistörn.
Valdís Þóra er í sjötta sæti peningalistans á LET Evrópumótaröðinni en þetta er annað keppnisárið hjá henni á mótaröðinni.
