Valdís Þóra Jónsdóttir, atvinnukylfingur úr Leyni Akranesi, komst ekki í gegnum 2. stig úrtökumótsins fyrir LPGA mótaröðina í Bandaríkjunum. Mótið fór fram í Flórdída á Plantation Golf & Country Club, í Venice.
Valdís Þóra lék hringina fjóra á 298 höggum eða +10 (76-78-73-71). Hún endaði í 110. sæti en alls komust 41 áfram á lokastigið. Valdís Þóra var 10 höggum frá því að komast áfram.
Alls voru leiknir fjórir hringir en alls komust 216 keppendur inn á 2. stigið.
Valdís Þóra hefur á undanförnum vikum dvalið við æfingar í Bandaríkjunum. Hún hefur m.a. æft hjá Tómasi Aðalsteinssyni. Hann er með meistaragráðu í íþróttasálfræði frá John F. Kennedy University í Kaliforníu og veitir ráðgjöf og fræðslu um hugarþjálfun í golfi og öðrum íþróttum.
Tómas Freyr er aðstoðarprófessor við Williams College í Massachusetts í Bandaríkjunum og er yfirþjálfari kvennagolfliðs skólans.